हॅलो बॉलिवूड ऑनलाईन। आपल्या अभिनयाचं नाणं खणखणीत वाजवणारा अभिनेता मंगेश देसाई गेल्या अनेक दिवसांपासून चित्रपटात काम करताना दिसला नाही. पण आता लवकरच पुन्हा एकदा रुपेरी पडदा गाजवण्यासाठी मंगेश देसाई सज्ज झाले आहेत. आगामी मराठी चित्रपट ‘अंकुश’मध्ये अभिनेता मंगेश देसाई अत्यंत दमदार भूमिकेत दिसणार आहे. त्यांच्या भूमिकेचे पहिले वहिले आणि अत्यंत लक्षवेधी असे मोशन पोस्टर नुकतेच प्रदर्शित झाले आहे. जे सोशल मीडियावर व्हायरल होत आहे.
अभिनेता मंगेश देसाई ‘अंकुश’ या चित्रपटात अत्यंत महत्वपूर्ण भूमिकेत दिसणार आहेत. ते साकारत असलेल्या भूमिकेचे नाव ‘साजनभाई’ असे असून या भूमिकेतील त्यांचा अत्यंत वेगळा असा रावडी लूक लाँच करण्यात आला आहे. ओमकार फिल्म्स क्रिएशन्सच्या माध्यमातून राजाभाऊ घुले ‘अंकुश’ या चित्रपटाद्वारे चित्रपट निर्मिती क्षेत्रामध्ये धडाकेबाज पदार्पण करत आहेत. ‘अंकुश’ हा चित्रपट येत्या ६ ऑक्टोबर २०२३ रोजी प्रदर्शित होत आहे. नुकताच या चित्रपटाचा थरारक टीजरदेखील लाँच करण्यात आला. ज्याला प्रेक्षकांकडून उत्तम प्रतिसाद लाभत आहे.
या चित्रपटात केतकी माटेगावकर एका करारी भूमिकेत दिसणार आहे. तिच्यासह आता मंगेश देसाईच्या साजनभाई या भूमिकेचा रावडी लूक समोर आला आहे. मंगेश देसाईनं आजवर त्याच्या वाट्याला आलेली प्रत्येक भूमिका आपल्या सशक्त अभिनयानं सजवली आहे. त्यामुळेच मराठीतील कसदार अभिनेत्यांमध्ये मंगेशचं नाव आवर्जून घेतलं जातं. मल्टिस्टारकास्ट असलेल्या या चित्रपटातून अभिनेत्री केतकी माटेगावकर, अभिनेता मंगेश देसाई यांच्यामुळे अंकुश चित्रपटातील एकाहून एक सरस कलाकार आता समोर येऊ लागले आहेत . त्यामुळे चित्रपटाविषयीचं कुतूहल दिवसेंदिवस वाढतंच आहे.