हॅलो बॉलिवूड ऑनलाईन। शिवराज अष्टकातील चार चित्रपटांनी आधीच प्रेक्षकांना छत्रपती शिवाजी महाराजांच्या भव्य इतिहासाचे मोठ्या पडद्यावर दर्शन घडवले आहे. यानंतर आता शिवराज अष्टकातील पाचवे पुष्प ‘सुभेदार’ प्रेक्षकांच्या भेटीस येऊ घातले आहे. दिग्पाल लांजेकर यांच्या शिवराज अष्टक पर्वातील हा पाचवा सिनेमा म्हणुन प्रेक्षकांमध्ये मोठी उत्सुकता आहे. ‘सुभेदार’ या चित्रपटातून नरवीर तान्हाजी मालुसरे आणि त्यांचे शुर मावळे यांची शूरगाथा पहायला मिळणार आहे. नुकतेच या चित्रपटाचे एक नवे आणि अत्यंत रोमांचकारी असे पोस्टर समोर आले आहे.
‘सुभेदार’ चित्रपटाच्या अधिकृत सोशल मीडिया हॅन्डल इंस्टाग्रामवर हे नवे पोस्टर शेअर करण्यात आले आहे. हे पोस्टर शेअर करताना त्याच्या कॅप्शनमध्ये लिहिण्यात आले आहे कि,
‘कोंढाणा आणिन स्वराज्यात
लावतो प्राणांची बाजी
शब्द असे, मातोश्री अन राजं
सांगती सुभेदार तान्हाजी’
या पोस्टरमध्ये आपण पाहू शकतो कि, छत्रपती शिवाजी महाराजांच्या चरणाशी तान्हाजी मालुसरे बसलेले दिसत आहेत. छत्रपती शिवाजी महाराजांसह इथे राजमाता जिजाऊदेखील दिसत आहेत. इथे तान्हाजी यांनी कोंढाणा मिळवण्याचा विडा उचलल्याचे दिसत आहे आणि त्यासोबत जिजाऊंच्या चेहऱ्यावर कौतुक तर राजे काळजीत दिसत आहेत. हा सिनेमा येत्या १८ ऑगस्ट २०२३ रोजी रिलीज होणार आहे.