हॅलो बॉलिवूड ऑनलाईन। छोट्या पडद्यावरील लोकप्रिय मालिका ‘आई कुठे काय करते’मध्ये अनघा हे पात्र साकारणारी अभिनेत्री अश्विनी महांगडे सोशल मीडियावर कायम सक्रिय असते. वेगवेगळ्या पोस्टच्या माध्यमातून ती सोशल मीडियावर नेटकऱ्यांचे लक्ष वेधून घेताना दिसते. अश्विनी महांगडेने नुकतीच एक पोस्ट शेअर केली आहे. ज्यामध्ये अश्विनीच्या भावाने दिवाळी पाडव्याच्या मुहुर्तावर ट्रॅक्टर खरेदी केल्याचे तिने सांगितले आहे. या पोस्टमध्ये तिने वडिलांचा उल्लेखदेखील केला आहे.
अभिनेत्री अश्विनी महांगडेने नुकतंच अधिकृत सोशल मीडिया हॅण्डल इंस्टाग्रामवर एक पोस्ट शेअर केली आहे. यामध्ये तिने एक व्हिडीओ पोस्ट केला आहे. या व्हिडिओमध्ये अश्विनी ट्रॅक्टर चालवताना आपण पाहू शकतो. तिच्या आजूबाजूला तिच्या कुटुंबातील सदस्य दिसत आहेत. अश्विनीने दिलेल्या माहितीनुसार, अश्विनीचा भाऊ बद्रीनाथ महांगडे याने नुकताच दिवाळी पाडव्याच्या मुहूर्तावर नवीन ट्रॅक्टर खरेदी केला आहे. तिने या व्हिडिओसोबत लिहिलेल्या कॅप्शनमध्ये भावाचे कौतुक केले आहे.
अश्विनीने लिहिलंय, ‘स्वराज्य…. भावाने ट्रॅक्टर घेतला….. नाना…. आम्ही स्वराज्य #वाढवू आणि #टिकवू सुद्धा….. बद्री #bro_sis #आनंदाची व्याख्या हीच की भाऊ प्रगती करतोय’. या पोस्टसोबत अश्विनीने आणखी एक व्हिडीओ शेअर केला आहे. ज्यामध्ये तिने ट्रॅक्टर खरेदी करतानाची प्रक्रिया दाखवली आहे. अश्विनीने शेअर केलेल्या या पोस्टवर अनेक नेटकऱ्यांनी प्रतिक्रिया दिली आहे. अनेकांनी तिच्या भावाचे अभिनंदन केले आहे. एकीकडे दिवाळीच्या मुहूर्तावर लोक महागड्या गाड्या घेत आहेत. तर दुसरीकडे अश्विनीच्या भावाने मात्र ट्रॅक्टर खरेदी केला हे पाहून लोकांनी त्याचे कौतुक केले आहे.