हॅलो बॉलिवूड ऑनलाईन। प्रसिद्ध अभिनेत्री माधुरी दीक्षित आणि तिचे पती डॉ. श्रीराम नेने यांची निर्मिती असलेला ‘पंचक’ हा चित्रपट येत्या नववर्षात म्हणजेच ५ जानेवारी २०२४ रोजी प्रेक्षकांच्या भेटीस येतोय. काही दिवसांपूर्वीच या चित्रपटाचा ट्रेलर लाँच सोहळा उत्साहात पार पडला.
या ट्रेलरला प्रेक्षकांचा भरभरून प्रतिसाद मिळत आहे. केवळ प्रेक्षक नव्हे तर सिनेविश्वातूनही ट्रेलरला पसंती मिळतेय. यामध्ये बॉलिवूडकरांचा देखील समावेश आहे. बॉलिवूड सेलिब्रिटी सोशल मीडियावरून डॉ. श्रीराम नेने आणि माधुरी दीक्षित यांच्यावर शुभेच्छांचा वर्षाव करत आहेत.
यात काजोल,शिल्पा शेट्टी, रितेश देशमुख, करण जोहर, संजय कपूर अशा अनेक नामवंतांनी आपल्या सोशल मीडियावरून ट्रेलरचे भरभरून कौतुक केले आहे. माधुरी दीक्षित निर्मिती ‘पंचक’ या चित्रपटात जयंत जठार आणि राहुल आवटे दिग्दर्शित या चित्रपटात आदिनाथ कोठारे, दिलीप प्रभावळकर, भारती आचरेकर, आनंद इंगळे, तेजश्री प्रधान, सतीश आळेकर, नंदिता पाटकर, सागर तळाशीकर, संपदा कुलकर्णी, आशिष कुलकर्णी, दिप्ती देवी, विद्याधर जोशी, आरती वडगबाळकर, गणेश मयेकर अशी तगडी स्टारकास्ट आपल्या भेटीला येते आहे. राहुल आवटे लिखित ‘पंचक’ चित्रपटाचे नितीन प्रकाश वैद्य हे कार्यकारी निर्माते आहेत.
प्रेक्षकांकडून आणि सिनेइंडस्ट्रीतील सह कलाकारांकडून मिळणाऱ्या शुभेच्छांबद्दल बोलताना अभिनेत्री- निर्माती माधुरी दीक्षित नेने यांनी म्हटले कि, ‘खूप छान वाटत आहे. प्रेक्षकांना, इंडस्ट्रीतील माझ्या मित्र परिवाराला ”पंचक”चा ट्रेलर आवडला. सगळ्यांचे मनापासून आभार. तुमचे प्रेम आमच्या टीमवर सदैव असेच असुदे. मला खात्री आहे माझा इंडस्ट्रीतील परिवार हा चित्रपट नक्की बघणार. प्रेक्षकांनाही ‘पंचक’ खूप आवडेल’. सध्या अशा मीडियावर ‘पंचक’चा ट्रेलर प्रचंड व्हायरल होत आहे.