हॅलो बॉलिवूड ऑनलाईन। झी मराठीची सर्वाधिक गाजलेली मालिका ‘तुझ्यात जीव रंगला’ मधून प्रकाशझोतात आलेले अभिनेता हार्दिक जोशी आणि अभिनेत्री अक्षया देवधर हे खऱ्या आयुष्यातही एकमेकांमध्ये गुंतले. दोघांनी लग्न केलं आणि आता ही मराठी मनोरंजन विश्वातील लोकप्रिय जोडी आहे. गेल्यावर्षी २ डिसेंबरला हार्दिक- अक्षयाचा विवाहसोहळा पुण्यात पार पडला. त्यानंतर हे जोडपं सतत वेगवेगळ्या कारणामुळे चर्चेत राहीलं आहे. अलीकडेच अक्षयाची मंगळागौर चर्चेत राहिली. यानंतर आता हार्दिक- अक्षयाचा पहिला गणेशोत्सव चर्चेचा विषय ठरला आहे.
यंदा अक्षया आणि हार्दिक यांच्या लग्नानंतरचा पहिला गणेशोत्सव आहे. त्यामुळे दोघांसाठीही हा सण खास ठरला आहे. अभिनेता हार्दिक जोशीच्या घरी सालाबादप्रमाणे यंदाही गणपती बाप्पाचे आगमन झाले आहे. अभिनेता हार्दिक जोशीने त्याच्या अधिकृत सोशल मीडिया हॅण्डल इंस्टाग्रामवर बाप्पाच्या आगमनाचा एक शॉर्ट व्हिडीओ शेअर केला आहे. सोबतच घरी विराजमान झालेल्या बाप्पाचा फोटो शेअर करत त्याने एक खास कॅप्शन शेअर केले आहे.
अभिनेता हार्दिक जोशीने इंस्टाग्रामवर घरगुती बाप्पाचा एक सुंदर फोटो शेअर केला आहे. या फोटोसोबत हार्दिकने लिहिलं आहे कि, ‘जोश्यांचा राजा २०२३… बायकोचा पहिला गणपती’. हार्दिकने शेअर केलेल्या या फोटोवर अनेक नेटकरी, चाहते कमेंट करताना दिसत आहेत. अत्यंत सुंदर मनमोहक बाप्पा आणि त्याच्यासाठी केलेली सजावट या फोटोमध्ये पहायला मिळत आहे. हार्दिकने शेअर केलेला बाप्पाचा फोटो सोशल मीडियावर व्हायरल होत असून चाहते या फोटोवर ‘गणपती बाप्पा मोरया.. मंगलमूर्ती मोरया’ अशा कमेंट करताना दिसत आहेत.