हॅलो बॉलिवूड ऑनलाईन। आज आपला देश ७५’वा प्रजासत्ताक दिन साजरा करत आहे. या दिवसानिमित्त संपूर्ण देशभरात भारतवासी जल्लोष करताना दिसतात. विविध ठिकाणी मोठमोठ्या कार्यक्रमाचे आयोजन केले जाते. या कार्यक्रमातून अनेक वीरांना सन्मानित केले जाते. शिवाय सोशल मीडियावर अनेक दिग्गज मंडळी आणि कलाकार विविध पोस्ट शेअर करत नेटकऱ्यांना शुभेच्छा देताना दिसतात. दरम्यान, प्रजासत्ताक दिनानिमित्त अभिनेता जितेंद्र जोशीने शेअर केलेली पोस्ट सर्वांचे लक्ष वेधून घेत आहे.
आज प्रजासत्ताक दिनाच्या शुभेच्छा देताना जितेंद्र जोशीने एक खास पोस्ट शेअर केली आहे. तसा तो कायम सोशल मीडियावर वेगवेगळ्या पोस्ट शेअर करून सर्वांचे लक्ष वेधून घेताना दिसतो. पण आज त्याने शेअर केलेली पोस्ट फार लक्षवेधी ठरतेय. हि एक व्हिडीओ पोस्ट आहे. अभिनेता जितेंद्र जोशीने पुण्यातील एका शाळेत साफसफाई करणाऱ्या एका व्यक्तीचा व्हिडीओ शेअर केला आहे. यामध्ये प्रजासत्ताक दिनाचा कार्यक्रम सुरू होण्यापूर्वी पहाटे ती व्यक्ती शाळेचा परिसर स्वच्छ करताना दिसत आहे.
हा व्हिडीओ शेअर करत जितेंद्रने कॅप्शनमध्ये लिहिलंय कि, ‘सकाळी ५.३० वाजता ही व्यक्ती शाळा तयार करते आहे. विद्येने बुध्दी प्राप्त होते आणि ज्ञान संपादन करता येतं. खरं ज्ञान हे की अशी असंख्य माणसं आपल्या कळत नकळत कार्यरत असतात. आपल्यासाठी काम करत असतात. त्यांची आपण दखल घ्यावी आणि त्यांच्यावर प्रेम करावं. प्रजासत्ताक दिनाच्या शुभेच्छा!!!’ अभिनेत्याच्या या पोस्टवर एका नेटकऱ्याने कमेंट करताना लिहिलंय, ‘ज्याला शून्याची किंमत कळते त्यालाच हिऱ्याची किंमत करता येते ते सर्व गुण आपल्यात आहे खूप छान पोस्ट केली आहे सर धन्यवाद खूप शिकायला मिळाले ‘.