हॅलो बॉलिवूड ऑनलाईन। ढोल- ताशाचा गजर… सोबतीला मर्दानी खेळ आणि शंख नादाच्या निनादात पारंपरिक पद्धतीने सजविलेल्या रथात हिंदुस्थानातील पहिला सार्वजनिक गणपती असलेल्या पुण्यातील ‘श्रीमंत भाऊसाहेब रंगारी ट्रस्ट’च्या बाप्पाचे जंगी मिरवणुकीने वाजत- गाजत आगमन झाले. त्यानंतर विधीवत पूजा करून मंगलमूर्ती मोरयाच्या जयघोषात भक्तीभावाने बाप्पाची ‘ओंकार महाला’त प्रतिष्ठापना करण्यात आली. बाप्पाच्या मिरवणुकीची शान वाढविण्यासाठी ‘कलावंत’ ढोलताशा पथकाने देखील हजेरी लावली होती. कलावंतांची बाप्पाप्रती असणारी आस्था त्यांच्या प्रदर्शनातून दिसत होती. या पथकाला पाहण्यासाठी आणि मिरवणुकीचा जल्लोष अनुभवण्यासाठी पुणेकरांची मोठी गर्दी यावेळी पहायला मिळाली.
आज गणेश चतुर्थीच्या निमित्ताने सकाळी साडेनऊ वाजण्याच्या सुमारास श्रीमंत भाऊसाहेब रंगारी भवन येथून रथामध्ये बाप्पाच्या जंगी मिरवणुकीस सुरुवात झाली. रथासमोर पारंपरिक पांढऱ्या शुभ्र टोप्या परिधान केलेले ‘श्रीराम’ पथक, अस्सल पुणेरी पोशाखातील आणि दरवर्षी मिरवणुकांचे आकर्षण ठरणारे मराठी चित्रपट अभिनेत्यांचा सहभाग असलेले ‘कलावंत’ पथक, त्यापुढे ‘गजर’ पथक, ‘केशव शंखनाद’ पथक या सर्व पथकांच्या गजरात बाप्पाची मिरवणूक अप्पा बळवंत चौक मार्गे बाजीराव रस्त्याने शनिवार वाड्यापासून श्रीमंत भाऊसाहेब रंगारी ट्रस्ट येथे पोहोचली. या मिरवणुकीत असंख्य गणेशभक्त सहभागी झाले होते.
दरम्यान, या मिरवणुकीचा थाट पाहण्यासाठी हजारोंच्या संख्येने पुणेकर भाविकांनी गर्दी केली होती. यामध्ये विशेष करून तरुणाईचा मोठा उत्साह पहायला मिळाला. सेल्फी सोबतच कँडीड फोटो टिपण्यात तरुणाई गर्क झाली होती. दुपारी साडेबारा वाजण्याच्या सुमारास बाप्पाचे ओंकार महालात आगमन झाले. त्यानंतर ज्येष्ठ तबला वादक पद्मश्री पंडित विजय घाटे यांच्या हस्ते सपत्नीक विधीवत बाप्पाची प्रतिष्ठापना करण्यात आली. यावेळी श्रीमंत भाऊसाहेब रंगारी ट्रस्टचे विश्वस्त आणि उत्सव प्रमुख पुनीत बालन व जान्हवी धारिवाल-बालन, ट्रस्टचे अन्य विश्वस्त व पदाधिकारी आणि अनेक गणेशभक्त उपस्थित होते. पुढील दहा दिवस आमच्या ट्रस्टच्या वतीने विविध सामाजिक आणि धार्मिक कार्यक्रमांचे आयोजन करण्यात आल्याची माहिती यावेळी उत्सवप्रमुख पुनीत बालन यांनी दिली. तसेच गणेश भक्तांसाठी आरोग्य शिबीराचेही आयोजन करण्यात आल्याचे त्यांनी सांगितले.