हॅलो बॉलिवूड ऑनलाईन। ‘बिग बॉस मराठी सीजन ४’मधून प्रकाश झोतात आलेले अभिनेते किरण माने हे सोशल मीडियावर कायम चर्चेत असतात. ‘मुलगी झाली हो’ या मालिकेदरम्यान झालेल्या वादांमुळे किरण माने यांना अत्यंत वाईट काळाचा सामना करावा लागला होता. त्यांच्यावर अनेक आरोप लावले गेले. मात्र बिगबॉसमधून बाहेर पडल्यानंतर त्यांच्या प्रतिमेबाबत प्रेक्षकांच्या मनात तसूभरही शंका राहिली नाही. उलट त्यांचे चाहते त्यांना आगामी प्रोजेक्ट्समध्ये पाहण्यासाठी आतुर होते. तर आता लवकरच कलर्स मराठीवरील नवी मालिका ‘सिंधुताई माझी माई’मधून किरण माने अत्यंत महत्वाच्या भूमिकेत प्रेक्षकांच्या भेटीला येत आहेत.
सध्या सोशल मीडियावर या आगामी मालिकेचा प्रोमो व्हायरल होत आहे. ज्यामध्ये किरण माने दिसत आहेत. या मालिकेत ते सिंधुताईंचे पिता अभिमान साठे यांच्या भूमिकेत दिसणार आहेत. दरम्यान किरण माने यांनी आपल्या आवाजात ‘सिंधुताई माझी माई- गोष्ट एका चिंधीची’ या आगामी मालिकेच्या शीर्षक गीताने काही बोल गायले आहेत. त्याचा व्हिडीओ सोशल मीडियावर व्हायरल होत आहे.
जीव आकाशाचा केला, चिंधीवर जरी शेला
अनाथांना मिळे आई, सिंधुताई माझी माई… सिंधुताई माझी माई…।।
किरण माने पुढे म्हणाले, ‘एक चिंधी आहे तिचा भरजरी शेला कसा झाला तो तुम्हाला बघायला मिळेल’. या व्हिडिओवर कमेंट करताना प्रेक्षक मालिकेविषयी उत्सुक असल्याचे सांगत आहेत. ‘मुलगी झाली हो’ या मालिकेनंतर एक मोठा गॅप घेत आता किरण माने पुन्हा एकदा मालिका विश्वात आपल्या अभिनयाची जादू दाखवताना दिसणार आहेत. त्यामुळे त्यांचे चाहते या मालिकेत त्यांना पाहण्यासाठी आतुर झाले आहेत. ‘सिंधुताई माझी माई- गोष्ट एका चिंधीची’ हि मालिका येत्या १५ ऑगस्ट २०२३ पासून कलर्स मराठी वाहिनीवर संध्याकाळी ७.०० वाजता पाहता येणार आहे.