हॅलो बॉलिवूड ऑनलाईन। मराठी सिनेसृष्टीत कायम वेगवेगळे प्रयोग होत असतात. असाच एक नवा प्रयोग आणि नवी कलाकृती लवकरच प्रेक्षकांच्या भेटीला येत आहे. आपण ‘डिलिव्हरी बॉय’ हे नाव ऐकले की, डोळ्यांसमोर येतो तो घरी येऊन सामान आणून देणारा व्यक्ती. मात्र सध्या सोशल मीडियावर झळकलेल्या ‘डिलिव्हरी बॅाय’च्या पोस्टरने अनेकांचे लक्ष वेधले आहे.
या पोस्टरमध्ये एक बॅाक्स दिसतोय आणि त्यामध्ये छोटेसे बाळ दिसत आहे. आता हे बॅाक्समधील बाळ आणि डिलिव्हरी बॅायचा नेमका संबंध काय..? हे या चित्रपटात पहायला मिळणार आहे. दरम्यान हा चित्रपट येत्या ९ फेब्रुवारी २०२४ रोजी प्रेक्षकांच्या भेटीला येणार आहे. या आगामी चित्रपटात अभिनेता प्रथमेश परब, पृथ्वीक प्रताप आणि अभिनेत्री अंकिता लांडे पाटील या कलाकारांच्या प्रमुख भूमिका आहेत.
लुसिया एंटरटेनमेंट प्रोडक्शन हाऊस निर्मित, सिनेपोलिस सिनेमा प्रस्तुत, मोहसीन खान दिग्दर्शित या चित्रपटाचे दीपा नायक प्रस्तुतकर्ता आहेत. तर डेव्हिड नादर या चित्रपटाचे निर्माते आहेत. राम खाटमोडे आणि विनोद वणवे यांनी या चित्रपटाचे लेखन केले आहे. दरम्यान चित्रपटाचे दिग्दर्शक मोहसीन खान म्हणाले कि, ‘ ”डिलिव्हरी बॉय” हा चित्रपट नक्कीच प्रेक्षकांचे मनोरंजन करेल. हसत हसत सामाजिक संदेश देणारा हा सिनेमा आहे. या चित्रपटाचे नाव ”डिलिव्हरी बॅाय” का आहे..? याचे उत्तर लवकरच प्रेक्षकांना मिळणार आहे’. ’