हॅलो बॉलिवूड ऑनलाईन। ‘धर्मवीर… मुक्काम पोस्ट ठाणे’ या चित्रपटाच्या अभूतपूर्व यशानंतर आता ‘धर्मवीर २’ हा चित्रपट येऊ घातला आहे. नुकताच ‘धर्मवीर २’ या चित्रपटाचा मुहूर्त पार पडला. राज्याचे मुख्यमंत्री एकनाथ शिंदे यांच्या हस्ते चित्रपटाचे टायटल पोस्टर रिलीज करण्यात आले. सोशल मीडियावर हा टिझर व्हिडीओ व्हायरल होत असून प्रेक्षकांची चांगली पसंती मिळवत आहे. दरम्यान मुहूर्त पूजेनंतर आता या चित्रपटाचे शूटिंग येत्या ९ डिसेंबर २०२३ पासून ठाणे येथे सुरु होणार असल्याची माहिती देण्यात आली आहे.
‘धर्मवीर’ या चित्रपटात ठाण्याचा ढाण्या वाघ स्वर्गीय आनंद दिघे यांचा जीवनप्रवास आपण पाहिला. यानंतर आता ‘धर्मवीर २’ या चित्रपटात आनंद दिघे साहेबांच्या हिंदुत्वाची गोष्ट पहायला मिळणार आहे. मंगेश देसाई यांच्या साहील मोशन आर्ट्स या निर्मिती संस्थेद्वारे या चित्रपटाची निर्मिती केली जात आहे. तर चित्रपटाचे दिग्दर्शन प्रवीण विट्ठल तरडे करत आहेत. याहीवेळी आनंद दिघे यांची भूमिका अभिनेता प्रसाद ओकच्या पदरी पडली आहे. त्यामुळे प्रेक्षक पुन्हा एकदा प्रसादला दिघेंच्या लूकमध्ये पाहण्यासाठी आतुर झाले आहेत.
आतापर्यंत केवळ टायटल टिझर समोर आला आहे पण लवकरच चित्रपटाच्या पुढील अपडेट येतील, असे निर्मात्यांनी सांगितले. अद्याप या चित्रपटात अन्य कोणते कलाकार दिसणार हे समोर आलेले नाही. मात्र मुहुर्तावेळी अभिनेता रमेश परदेशी, क्षितिश दाते आणि बिग बॉस मराठी फेम जय दुधाणे यांची उपस्थिती लक्षवेधी ठरली. याआधी धर्मवीर’मध्ये क्षितीश दाते या अभिनेत्याने एकनाथ शिंदे यांची भूमिका साकारली होती. त्यामुळे ‘धर्मवीर २’मध्येही तो शिंदेंची भूमिका साकारताना दिसणार आहे. तर रमेश परदेशी आणि जय दुधाणेदेखील महत्वाच्या भूमिकेत असतील, असा अंदाज आहे.