हॅलो बॉलिवूड ऑनलाईन। सध्या सर्वत्र ‘झिम्मा २’ या आगामी मराठी चित्रपटाची जोरदार चर्चा सुरू आहे. या चित्रपटाचा पहिला भाग प्रेक्षकांना प्रचंड आवडला होता. लॉकडाऊननंतर बॉक्स ऑफिस गाजवणारा ‘झिम्मा’ हा पहिला चित्रपट होता. तेव्हपासून प्रेक्षकांमध्ये या चित्रपटाच्या सीक्वेलची चर्चा आहे. आता ‘झिम्मा २’मध्ये दोन गडी नव्याने सामील झाले आहेत. त्यामुळे चित्रपटाबाबत आणखीच उत्सुकता वाढली आहे. दरम्यान ‘झिम्मा २’मधील ‘मराठी पोरी..’ हे गाणं तुफान गाजलं असून या गाण्यावर अभिनेत्री शिवानी सुर्वेने बॉयफ्रेंडसोबत डान्स केला आहे. हा व्हिडीओ व्हायरल होतोय.
‘झिम्मा २’मध्ये इंदू डार्लिंगचा वाढदिवस साजरा करण्यासाठी सगळ्या मिळून परदेशात गेल्या आहेत. वाढदिवसाची भन्नाट थीम आणि ‘मराठी पोरी…’ हे गाणं ओसशल मीडियावर कमालीचं व्हायरल होत आहे. दरम्यान या चित्रपटात शिवानी सुर्वेची एका नव्या भूमिकेतून दमदार एंट्री झाली आहे. अशातच शिवानी नुकतीच तिचा बॉयफ्रेंड अभिनेता अजिंक्य ननावरेसोबत ‘झिम्मा २’मधील पहिलं वहिलं गाणं ‘मराठी पोरी दुनियेला दाखवती माज…’वर थिरकताना दिसली आहे.
‘झिम्मा २’मध्ये शिवानी मनाली हे पात्र साकारत आहे. तर शिवानीने म्हणजेच ‘झिम्मा २’मधील मनालीने खरी आयुष्यात खऱ्या बॉयफ्रेंडसोबत ‘मराठी पोरी’ गाण्यावर जबरदस्त डान्स केला आहे. या व्हिडीओच्या कॅप्शनमध्ये तिने लिहिलंय, ‘आज पाडव्यानिमित्त खास… अजिंक्यबरोबर पहिल्यांदाच डान्स केला’. या व्हिडिओवर नेटकरी कमेंट करताना दिसत आहेत. शिवानी सुर्वेचा बॉयफ्रेंड म्हणजेच अभिनेता अजिंक्य ननावरे सध्या झी मराठीच्या ‘सातव्या मुलीची सातवी मुलगी’ या मालिकेत मुख्य भूमिकेत झळकतो आहे. गेली अनेक वर्ष शिवानी आणि अजिंक्य एकमेकांना डेट करत आहेत.