हॅलो बॉलिवूड ऑनलाईन। मनोरंजन विश्वात चित्रपटांइतकेच महत्वाचे माध्यम म्हणून नाटकांकडे पाहिले. सिनेमांइतकाच नाटकांचा चाहता वर्ग देखील फार मोठा आहे. त्यामुळे चित्रपटगृह जितके महत्वाचे तितकेच महत्वाचे नाट्यगृह आहे. हे माहित असले तरीही या माध्यमांना अनेक अडीअडचणींना सामोरे जावे लागते. मराठी अभिनेता सुयश टिळक याने आतापर्यंत अनेक मालिका गाजवल्या आहेत. गेल्या काही काळापासून तो नाट्यक्षेत्रात प्रचंड सक्रीय असून ‘मी स्वरा आणि ती दोघं’ या नाटकात तो कार्यरत आहे. दरम्यान त्याने नाट्यगृहांच्या दुरावस्थेबद्दल भाष्य करताना एक कलाकार आणि एक माणूस म्हणून आपली खंत व्यक्त केली आहे.
अभिनेता सुयश टिळकने नुकतंच ‘मित्र म्हणे’ या युट्यूब चॅनलला एक खास मुलाखत दिली होती. ज्याच्या माध्यमातून त्याला नाट्यगृहांच्या सध्याच्या दुरावस्थेबद्दल प्रश्न विचारण्यात आला असता त्याने थेट आणि स्पष्ट भाष्य केले आहे. या प्रश्नाचे उत्तर देताना सुयशने नाट्यगृहांची परिस्थिती, प्रयोग करताना येणाऱ्या अडचणी, स्वच्छतागृह, मेकअप रुम यांच्या दुरावस्थेबद्दल सांगितले. तो म्हणाला कि, ‘नाट्यगृहाच्या सध्याच्या दुरावस्थेबद्दल अनेकदा तक्रार करुन झाल्या आहेत. जर तू महाराष्ट्रातील नाट्यगृहांमध्ये गेलास तर तिथे माझ्या नावाने लिहिलेलं तक्रार पत्र तुम्हाला नक्कीच सापडेल. कारण मी अनेकदा प्रयोग झाल्यानंतर त्या कार्यालयात जाऊन लेखी तक्रार नोंदवतो. आता तर खूप वाईट अवस्था आहे. पुणे, मुंबईसारख्या शहरात जिथे नाटकाचे प्रयोग सर्वात जास्त होतात, तिथल्या नाट्यगृहांमध्ये लाईट्सची व्यवस्था नाही. ज्या ठिकाणी प्रयोग सादर केला जातो, तिथे असलेल्या फळ्या उखडलेल्या आहेत’.
‘अनेकदा आम्हाला लाईट्स स्वत: घेऊन जावे लागतात. ते लाईट्स घेऊन गेलो तरीही ते वर लावण्याची सोय नाही. काही ठिकाण तर सॉकेट गेलेले आहेत. वायरिंग खराब झालेलं आहे. एसीची अनेक ठिकाणी बोंब आहे. अनेकदा घामाने पूर्ण भिजलेलो असताना त्या अवस्थेत आम्हाला शो करावा लागतो. मेकअप रुममध्ये अजूनच वेगळी अवस्था आहे. मला हे सांगायला अत्यंत वाईट वाटतं की, महाराष्ट्रात जिथे नाट्यगृह मोठ्या प्रमाणात आहे. तिथे नाटकाचा एक ठराविक प्रेक्षकवर्ग अनेक वर्ष येत आहे. त्या ठिकाणाच्या नाट्यगृहाची ही अवस्था आहे. टॉयलेट खराब आहेत. तुम्ही उभंही राहू शकत नाही, अशी अवस्था शौचालयांची झाली आहे. मेकअपरुममध्ये बसायच्या खुर्च्या तुटलेल्या असतात. तिथे बसायची सोय नसते. तिकडचे लाईट्स चालू नसतात. पुरुषांचं एकवेळ ठिक आहे. ते समजून घेतात. पण स्त्रियांना तर याचा प्रचंड मनस्ताप होतो. त्यांना व्हिआयपी रुमदेखील कित्येकदा दिल्या जात नाहीत. अशावेळी स्वत:ची समजूत काढून प्रयोग करत राहायचं’.