हॅलो बॉलिवूड ऑनलाईन। स्टार प्रवाह वाहिनीवरील ‘सुख म्हणजे नक्की काय असतं’ या मालिकेने प्रेक्षकांच्या मनात हक्काचे स्थान निर्माण केले आहे. या मालिकेला प्रेक्षकांची विशेष पसंती लाभली आहे. मालिकेचे कथानक, वळणे, कलाकारांचा अभिनय आणि शीर्षक गीत प्रेक्षकांच्या पसंतीचे कारण ठरले. दरम्यान नुकतेच या मालिकेने ९०० भाग पूर्ण करून आणखी एक यशस्वी टप्पा पूर्ण केला आहे. मध्यंतरी हि मालिका बंद होणार असे समोर आल्याने प्रेक्षक नाराज झाले होते. मात्र आता समजतंय कि मालिका बंद होणार नसून वेगळ्या वळणावर पोहोचली आहे.
या मालिकेत अभिनेत्री गिरीजा प्रभू, मंदार जाधव, माधवी निमकर, वर्षा उसगावकर, सुनील गोडसे, मिनाक्षी राठोड अशी तगडी स्टारकास्ट आहे. प्रत्येकाची भूमिका त्यांनी अव्वलरित्या साकारली आहे. सध्या मालिकेतील ट्विस्टनुसार, लवकरच शालिनी गौरी आणि जयदीपच्या प्रेमाचा शेवट करताना पहायला मिळणार आहे. तसा सोशल मीडियावर प्रोमो व्हायरल झाला आहे. जो पाहून प्रेक्षकांनी उत्सुकता व्यक्त केली आहे. हा प्रोमो स्टार प्रवाहाच्या अधिकृत सोशल मीडिया हॅण्डल इंस्टाग्रामवर शेअर करण्यात आला आहे.
या प्रोमोमध्ये शालिनी बोलताना दिसतेय कि, ‘मरणाचं असं तांडव केलंय या शालिनीने की पुढली १०० वर्ष तुम्हाला जन्म द्यायला भी घाबरेल… “नियती”..’ दरम्यान शालिनी जयदीप आणि गौरीवर तलवारीने वार करताना दिसते. शालिनीच्या चेहऱ्यावर रक्त उडते. यानंतर ‘अखेर जयदीप- गौरीच्या प्रेमाचा शेवट करणार शालिनी…’ असा बॅकग्राउंड व्हॉइस ऐकू येतो. असा हा प्रोमो ससोहळ मीडियावर व्हायरल झाला असून प्रेक्षक वेगवेगळ्या प्रतिक्रिया देत आहेत. काही प्रेक्षक ही मालिका संपावी म्हणून वाट बघत आहेत तर काही प्रेक्षक मालिकेतील नव्या वळणाबाबत उत्सुक आहेत.