हॅलो बॉलिवूड ऑनलाईन। मालिका विश्वातील अत्यंत लोकप्रिय चेहरा अभिनेत्री तेजश्री प्रधान गेल्या बऱ्याच काळापासून कला विश्वापासून लांब आहे. झी मराठीवर लोकप्रिय ठरलेली मालिका ‘होणार सून मी ह्या घरची’मधून तिने साकारलेली जान्हवी आजही प्रेक्षकांच्या लक्षात आहे. इतकेच काय तर याच वाहिनीवरील ‘अग्गंबाई सासूबाई’ या मालिकेत तिने शुभ्रा हे पात्र साकारले होते आणि पुन्हा एकदा प्रेक्षकांवर जादू केली. पुढे तिने काही चित्रपटांमध्ये काम केल्याचे दिसले. पण तिने मालिका विश्वात परत यावे असे प्रत्येकाला वाटत होते. अखेर आता तिच्या चाहत्यांची ही इच्छा पूर्ण होणार आहे.
लोकप्रिय मालिकेतून घराघरात पोहोचलेली अभिनेत्री तेजश्री प्रधान तिच्या चाहत्यांसाठी एक आनंदाची बातमी घेऊन आली आहे. तेजश्री लवकरच एका मालिकेतून पुन्हा एकदा प्रेक्षकांचे मनोरंजन करताना दिसणार आहे. यावेळी तेजश्री प्रधान आपल्याला ‘स्टार प्रवाह’ या वाहिनीवर सुरु होणाऱ्या आगामी मालिकेत मध्यवर्ती भूमिकेतून भेटायला येणार आहे. यात अद्याप इतकीच माहिती दिलेली असली तरीही हि माहिती स्वतः तेजश्रीने दिल्यामुळे चाहत्यांमध्ये आनंदाचे वातावरण आहे. नुकताच तेजश्रीने या संबंधित एक व्हिडीओ सोशल मीडियावर शेअर केला आहे.
या व्हिडीओत तेजश्री म्हणतेय की, ‘आपली मराठी परंपरा मराठी प्रवाह… येस, बरोबर ओळखलंत. मी येतेय आपल्या स्टार प्रवाहच्या नव्याकोऱ्या मालिकेतून खास तुमच्या भेटीसाठी… आता मालिकेचं नाव, तारीख, वेळ ही सगळी उत्सुकता पूर्ण होणार आहे, आमच्या नव्याकोऱ्या प्रोमोमधून. पण त्यासाठी तुम्ही बघत राहा, आपलं स्टार प्रवाह’. तेजश्रीच्या या व्हिडीओवर तिच्या चाहत्यांनी भरभरून लाईक्स आणि कमेंट्सचा वर्षाव केला आहे. ‘लवकर ये.. तुला नव्या भूमिकेत पहायला आम्ही फार उत्सुक आहोत’, ‘आम्ही याचीच तर वाट बघत होतो’ अशा विविध कमेंट्समधून चाहत्यांनी आपला आनंद व्यक्त केला आहे.